Bruto nationaol produk

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

't Bruto nationaol produk (BNP) is 'n gengbaar methode um de welveert vaan 'n nationaol ikkenemie in te sjatte. 't Steit geliek aon de totaol touwgevoogde weerde vaan alle geujere en deenste die door 'n bepaold land geproduceerd zien in 'n bepaolde periood (meistal 'n jaor): bruto binnelands produk plus primair inkoume verdeend door börgers in 't boeteland minus primair inkoume verdeend door boetelenders in 't land in kwestie. Samevattend beteikent 'binnelands’ hei verdeend/geproduceerd binne de grenze vaan 't land en 'nationaol’ verdeend/geproduceerd door de börgers vaan 'n land.

't BNP weurt dèks verward mèt 't Bruto binnelands produk (BBP), mer 't BBP besteit oet alle touwgevoogde weerde veurtgebrach binne de staotsgrenze vaan e land. 't BNP is dus 't BBP plus de door staotsbörgers in 't boeteland verdeende primair inkoumes minus de door boetelenders in 't betröffend land verdeende primair inkoumes. 't BNP vaan Belsj, beveurbeeld, is dus alle touwgevoogde weerde veurtgebrach binne de staotsgrenze vaan Belsj, plus 't primair inkoume verdeend door Belzje boete Belsj en minus 't primair inkoume verdeend door boetelenders in Belsj.

Mèt de introductie vaan nui internationaol riechlijne is 't konsep vaan 't bruto nationaol produk (BNP) vervaange door 't bruto nationaol inkoume (BNI). 't Bruto binnelands produk besteit oet alle touwgevoogde weerde die geproduceerd binne de grenze vaan 'n land zien. 't Bruto nationaaol inkoume is de definitie geliek aon 't bruto nationaol produk. Mit BNP kieke veer nao de totaol touwgevoog weerde vaan alle börgers vaan 'n land vaanoet 'n productieperspectief, en mèt BNI kieke veer nao de totaol toegevoogde weerde vaan alle börgers vaan 'n land vaanoet 'n inkommesperspectief. Aongezeen de ganse touwgevoogde weerde oeteindelek es inkoume weurt oetbetaold in de vörm vaan loene, rentes, häör/lease of wins, zien dees twie concepte in definitie geliek.

'n Dèks gemaakde kritiek op 't BNI is tot 't nao 't gemiddelde loert vaan inwoeners, mer daobij gein rekening hilt mèt beveurbeeld oongeliekheid (de Amerikane en Wes-Europeane genete vaan e vergeliekbaar gemiddeld BNI, mer Amerikane leve dèkser in ermooi es Wes-Europeane) of regionaol versjèlle (Nederlanders höbbe 'n get hoeger BNI es Belzje, mer dit gilt neet veur Limbörgers).