Lech Wałęsa

Lex Valensa

Mansabda boʻlgan yillari 22-dekabr 1990 – 22-dekabr 1995
Yordamchi(lar)	Tadeush Mazovyetskiy Yan Krjishtof Byeletskiy Yan Olshevskiy Valdemar Pavlak Xanna Suxotskaya Valdemar Pavlak Yuzef Oleksi
Avvalgi prezident	Voytsex Yaruzelskiy
Tavalludi	29-sentyabr 1943-yil (1943-09-29) Popovo, Polsha
Turmush oʻrtogʻi	Danuta Valensa

Lex Valensa (polyakcha: Lech Wałęsa; 29-sentyabr 1943, Popovo) polyak siyosatdoni, Polsha Respublikasining Prezidenti boʻlgan (1990-1995). Valensa shuningdek sobiq kasaba uyushmasi faoli va inson huquqlari himoyachisi hamdir. Sovet blokida birinchi mustaqil kasaba uyushmasi Hamjihatlik (Solidarność) tuzib, 1983-yili tinchlik uchun Nobel mukofotiga erishgan.

Valensa oliy maʼlumot olmagan, kasbi elektrik edi. Gdansk (sobiq „Lenin“) kemaxonasida ish boshlab, kasaba uyushmasi faoliga aylangan. Buning uchun u Polsha kommunist hukumati tomonidan jazolangan, kuzatuv ostiga qoʻyilgan, 1976-yili ishdan haydalgan, bir necha bor hibsga olingan. 1980-yil avgustida u ish tashlagan ishchilar va hukumat orasida Gdansk kelishuvini tuzishda katta rol oʻynab, Hamjihatlik harakatini boshladi. Bundan keyin u yana hibsga olindi, Hamjihatlik taqiqlandi. Ozodlikka chiqqanidan keyin 1989-yil iyunida parlament saylovi oʻtkazishda yordam qildi va natijada hukumat tepasiga Hamjihatlik keldi.

Valensa 1990-yilgi prezidentlik saylovida gʻolib chiqdi. Polshaning kommunist davlatdan bozor iqtisodiga oʻtishini boshqardi. Biroq bir necha yil davomida uning shuhrati pasaydi, 1995-yilgi prezidentlik saylovida yutqazdi va siyosatdagi ahamiyatini yoʻqotdi. Hozirda u tarix va siyosatdan maʼruzalar oʻqish bilan mashgʻul.